Hebrews 10

1Nia haganoho digau o Jew la nia ada mee hua, hagalee go nia mee donu. Ma go nia ada mee hua e haga modongoohia nia mee humalia ala ga lloomoi maalia. Gei tigidaumaha la taanga ga hana hua beelaa i nia ngadau huogodoo. Malaa, nia haganoho le e-haga madammaa behee nia daangada ala e loomoi gi God mai i nia tigidaumaha aanei? 2Maa nei bolo e donu bolo di hai daumaha o nia daangada ang gi God ne hagamadammaa digaula mai nadau ihala, ge gu hai digaula gi de longono ia nadau ihala, gei nia tigidaumaha la gu hagalee hai. 3Gei deeai, tigidaumaha dela e haihai i lodo nia ngadau huogodoo, di mee e haga langahia gi nadau huaidu ala e haihai i lodo nia ngadau ala e hagadau. 4Idimaa, nia dodo kau mo nia dodo kuud, e deemee di daa gi daha nia huaidu o nia daangada.

5Malaa, deenei tadinga a Christ i mua dono madagoaa ne hanimoi gi henuailala, mee ne helekai gi God boloo:

“Goe hagalee hiihai gi tigidaumaha mo di wanga dehuia dela e hai gi nia manu, gei goe ne hagatogomaalia tuaidina mai gi di au. ^a
6Goe hagalee tene gi nia wanga dehuia manu ala e dudu haga dogomaalia i hongo di gowaa dudu tigidaumaha, belee wwede nia huaidu. 7Gei au ga helekai gi mee: Deenei au, Meenei God, au belee hai doo manawa, gi hai be nnelekai ala gu lawa di hihi gi lodo di Beebaa Haganoho, ala e helehelekai i di au.” 8Matagidagi, gei mee ne helekai boloo: “Goe hagalee hiihai be e manawa tene gi tigidaumaha mo di wanga dehuia dela e hai gi nia manu e wwede nia huaidu.” Mee ne helekai nia mee beenei, maeaha maa nia tigidaumaha huogodoo le e- hai gi hai be nnaganoho. 9Mee ne helekai nomuli, “Deenei au, Meenei God, au belee hai doo manawa.” Malaa, God gu kili gi daha nia tigidaumaha namua, gu haga noho aga tigidaumaha hoou a Christ. 10Idimaa Jesus Christ gu haga gila aga di manawa o God, gei gidaadou huogodoo gu madammaa gi daha mo tadau huaidu, idimaa, mee gu tigidaumaha dono huaidina hagadahi mai gi gidaadou huogodoo. 11Digau hai mee dabu o Jew huogodoo e hai hegau i nia laangi huogodoo, e hai nadau tigidaumaha, malaa, nia tigidaumaha digaula e deemee di wwede nia huaidu. ^b 12Christ ne tigidaumaha haga dahi hua, tigidaumaha deenei le e mogobuna di wwede nia huaidu ge e noho hua beelaa i di baahi gau donu o God. ^c 13Deelaa di gowaa e talitali iei mee dolomeenei, ga dae loo gi di madagoaa God ga dugu ono hagadaumee gi lala be di llanga ono babaawae. 14Tigidaumaha deenei ne hai hua haga dahi, dela ne hai digaula gi dogu dogomaalia ga hana hua beelaa, go digau ala e haga madammaa gi daha nadau huaidu. 15Di Hagataalunga Dabu gu haga modongoohia mai gi gidaadou nia mee aanei, mee ne helekai matagidagi boloo,

16“Di Maadua e helekai: Deenei di hagababa dela ga hai ko au gi digaula i nia laangi ala ga loomoi, gei au ga haga honu digaula gi agu haganoho, ga hihi nia maa gi lodo nia manawa digaula.” ^d
17Mee ne helekai labelaa boloo,

“Au ga haga de langahia nia hagadilinga huaidu ala nogo hai go digaula.” ^e
18Di madagoaa nia huaidu aanei ga maahede, gei tigidaumaha dela belee wwede nia huaidu la hagalee hai labelaa, idimaa, tigidaumaha la dela hua gu hai haga dahi.

Gidaadou gi maanege adu gi God

19Ogu ihoo hagaaloho, gidaadou gu lawa maahede mai di made o Jesus, ga mee ai gidaadou di ulu i di Gowaa Koia e Dabuaahia. 20Christ gu huge mai gi gidaadou dahi ala e hoou ge mouli, e moe adu, gu ihaa i baahi i golo di gahu duuli di gowaa deelaa, gu dau adu gi di Gowaa Koia e Dabuaahia, di ala deenei la go dono huaidina. 21Malaa gidaadou gu iai tadau dangada hai mee dabu aamua, e dagi di hale o God. 22Deenei laa, gidaadou gi maanege adu gi God i di manawa madammaa mo di hagadonu e donu. Tadau manawa daamaha mo tadau huaidina huaidu gu lawa di gaugau gi nia wai madammaa. ^f 23Gidaadou gi daahia gi mau tadau hagadagadagagee dela nogo haga modongoohia go gidaadou, idimaa, God dela e hagadagadagagee ginai gidaadou, le e hai loo gi haga gila aga dana hagababa. 24Gidaadou gi hagadau hagamaamaa i di haga modongoohia aga tadau aloho, mo tadau hangaahai humalia huogodoo. 25Gidaadou gi hudee dugua tadau hai dagadagabuli, be di hai o hunu daangada. Gei gidaadou gi hagamahi hagamaaloo ina aga tangada nei mo tangada nei, idimaa, goodou gu iloo bolo di Laangi o Tagi la gu hoohoo mai.

26Maa gidaadou ga unu hua i lodo nia huaidu i muli tadau maalama gi nia agoago ala e donu, gu deai dahi tigidaumaha labelaa e mee di haga madammaa gidaadou gi daha mo nia huaidu, 27di mee i golo, go gidaadou e talitali mmaadagu di hagi aga mo nia mahi o di ahi dela ga dudu digau ala e hai baahi ang gi God. ^g 28Maa tangada ga de hagalongo gi nnaganoho Moses, ia e daaligi gi made maa ia gu hagi aga i nia hagadootonu o nia daangada dogolua be dogodolu bolo mee gu ihala, geia e deemee di dumaalia ginai. ^h 29Malaa goodou e hagamaanadu bolo aha gi tangada dela e haga balumee Tama a God? Tangada deelaa, e hagahuaidu nia dodo o di hagababa hoou, ala gu haga madammaa ia, ge e haganneennee di Hagataalunga mo dono dumaalia. Tangada beenei le e hagaduadua damanaiee! ⁱ 30Gidaadou gu iloo be di maa ko ai ne helekai: “Au ga hai baahi gi tongaadahi ga hui gi muli,” gei mee gu helekai labelaa: “Tagi ga hagi aga ana daangada.” ^j 31E hagamadagudagu dangada huoloo maa tangada ga doo gi lodo nia lima o di God Mouli!

32Goodou gi langahia godou hangaahai i lodo nia laangi i mua. I lodo nia laangi aalaa, i muli di maalama a God ne haga maalama goodou, gei nia haingadaa e logo gu tale adu gi goodou, gei goodou gu mau dangihi i lodo di madagoaa haingadaa, digi magedaa. 33Hunu madagoaa nia daangada e haga balumee goodou haga madammaa, gei e haga huahuaidu goodou. Hunu madagoaa gei goodou gu hiihai e buni ang gi digau ala gu kae nia hagadilinga hagaduadua beenei. 34Goodou gu kae di hagaduadua o digau lawalawa. Di madagoaa godou maluagina ne daa gi daha mo goodou, gei goodou gu hagakono di manawa tene, i goodou gu iloo bolo goodou gu hai mee gi nia mee koia e humalia ga hana hua beelaa. 35Hudee diagia godou manawa maaloo, idimaa, godou manawa maaloo la iai dono hui damana. 36Goodou e hai loo gi hagakono godou manawa, gei goodou ga mee di haga gila aga di manawa o God, ga hai mee gi ana mee ala gu lawa dana hagababa adu gi goodou. 37Di Beebaa Dabu e helekai boloo,

“Di madagoaa hua dulii i golo, gei mee dela e hanimoi, la ga dau mai, mee hagalee duai. ^k 38Agu daangada ala e donu ga mouli i nadau hagadonu. Maa tangada i digaula ga huli gi daha mo dono hagadonu, au hagalee loo e tene ginai.”
39Gidaadou hagalee e huli gi daha mo tadau hagadonu, gi de nngala. Gidaadou gu iai tadau hagadonu, gei gu hagamouli.